-
Sherlock Holmes
مساء الفلّ، هذا الأسبوع كان أسبوع شارلوك هولمز .. وأعتبره أسبوع موّفق!
مافيه أسوأ من إن وقتك يضيع على شي تافه خصوصاً اللأشياء اللي تشوفها وكأنها تأدية واجب لا توسع صدرك ولا تلهمك ولا شيء..
نرجع لشارلوك ؛ طبعا هذي التدوينة عن الثلاث مواسم من المسلسل؛ لكن مايمنع نسأل مين هو شارلوك؟
شارلوك هولمز هو شخصية خيالية لمحقق في لندن؛ مو محقق محقق نقول "محقق مستشار" يعني لما الشرطة تحتاجه تستشيره بسبب قدرته الخارقه على التفكير المنطقي وذاكرته الفتوغرافية، أول مابدت السلسله الروائية اللي تتألف من أربع روايات كانت تقص على لسان جون واطسون الطبيب والجندي صديق شارلوك ماعدا قصتين كان شارلوك يرويهم عن نفسه ..
كتب وابتكر القصة الطبيب والأديب "سير آرثر إغناتيوس كونان دويل" اللي استلهم القصه من طبيب عنده في المستشفى الملكي باسكتلندا، بنفس الطريقة كان يوصل لإستنتاجات كبيرة بناء على ملاحظات بسيطة !
نجي للمسلسل اللي فكرته إنه يمثل شارلوك لكن بزمن أكثر تطوّرا، وباستخدام تقنيات أكثر حداثة..
أنا ماشفت الفيلم و الصراحة لما بحثت شوي بالنت عن شارلوك قبل ما أقرر إني راح أتابع المسلسل إنصدمت إنه شخصيه خيالية يعني عمره مسوي أزمه ، نشأته وعائلته أنواع الأسلحة اللي استخدمها كل شي مجمع من القصص وكأنه لحياة شخص حقيقي ..
السلسلة حتى الآن من ثلاث مواسم، كل موسم ثلاث حلقات، كل حلقة ساعة ونص
اللي يمثل شخصية شارلوك بيندكت كامبرباتش على كل ذكاء شارلوك الا إنه مايعرف يتعامل مع الناس ولا يعترف بالمقاييس الإجتماعية فيبدأ المسلسل بشخصيته السايكوسوشيال وتصرفاته الغريبة، يلتقي بجون الطبيب وينتقل للسكن معه وتبدأ الأحداث من هنا من هالشقه بشارع بيكر .. د.جون كان طبيب جاي من الجيش وكان بأول حلقة يستعمل عكازه صار أحداث وأقنعه هولمز إن عرجه مجرد عرج نفسي! هذي اللقطه هي اللي خلتني أسوي كبتشينو وأستعد! لقطة الـ GO
جو المسلسل ( أنيق ) حوار ممتع مره، ستايل اسكتلندي رهيب من ورق الجدران للبدل للسيارات للساوند
مع لهجة بريطانية تجيب راسي!
أنا أفضل نوع التحقيق على كل أنواع الدراما إلا أن غالبية المحققين يطلعون بشكل عملي وشخصية بدم حار وبيت فوضوي بس شارلوك غير فيه مشاهد كان يعزف ببرود أو يشرب بفناجيل مورده يعني شيء كذا مزيج حلو بين الفوضوية والأناقة شي بالظبط بين الذكاء والبلاهة، المسلسل أبدا مو من نوع حبس الأنفاس والأكشن لأ نوع الـ95% بطولة رجالية على وتيره هادية وفخمة .. ينشاف بهدوء
برضو من أحلى الأشياء علاقة شارلوك بجون مع إنها كانت مشاهد بالدقائق بس كذا عمق الصداقة والخوف على الصديق الوحيد وصل بشكل حلو! علاقة شارلوك بأخوه الكبير شي بين الكبرياء والحرص.. الأحداث تنقلب بهدوء ومين يضمن الأحداث مع شخص زي شارلوك بقدرات خارقة نسبياً وأخو يعتبر هو "الحكومة" ؟
كان فيه شخصية ثانيه معتلة اجتماعيا لاكن تقدرون تقولون جانب الشيطان من الشخصيات "جيم مورياتي" إجرامي من السايكو اللي تعبيرات وجههم راح تضل براسي طريقة قوته وذكاءه و تنافسه مع شارلوك بمشاهده القصيرة يعني شخصين أذكياء مره ومختلين يتسلّون ببعض .. حلو إن مافيه شي يخلص بهالمسلسل مهما كانت الأحداث ولا فيه شي مضمون..
طريقة كتابة شخصية شارلوك جداً عبقرية يعني لا أنا اللي تحمست معها مره وحبيتها لأني ماضمنتها وكان يقهر أحياناً ولا أنا اللي كرهتها بس كذا شعور اللي ودي يستمر، بعكس جون اللي صيحني نهاية الموسم الثاني كذا عاطفة رجولية مدري كيف.. فيه أكثر من شخصية فرعية جميلة والله..
لكن لو رجعت للمنطق شوي بقول لكم إنه ما كان بيرفكت لأ كان متعاطي كان أحيانا يقتحم البيوت أو يخفي الأدلة عشان موكليه حسب البحث البسيط لقيت انه حتى بالرواية كان واطسون وهو يحكي يعتقد إنه أوكي لو يسوي كذا طول ماهو يقدر يبرر هالأشياء أخلاقيا يعني زي ماتقولون الأخلاق فوق القانون .. من الأشياء اللي أعتبرها يعني مدري كيف لطيفة نوعاً ما إن فيه دراسات اجتماعية عن جون واطسون إنه كان يتجنب التركيز على إدمان شارلوك لأنه ماودة يطلع صديقه المفضل و المحقق العبقري بشكل سيء.. اللطيف إذا ذكرتكم إن كل هذولا خيالات.. صراحة الكاتب بما إنه قدر يأثر على الناس بهذي الدرجة يدل على عبقريته علواً على إنه أكيد عبقري إذا كل هالقصص والتصورات من داخل رأسه.. أفكر أقرأ شي من المجموعة القصصية إذا وصلت لمرحلة إني أقدر أقراها بالإنجليزي طبعاً ..وش دخلنا طيب؟ ماعلينا نرجع أكثر أكثر شي يعني أبهرني إن المسلسل مو شارلوك بحياة جديدة لأ، المسلسل يختصر عليك قراءة الرواية؛ الرواية مكتوبه على لسان واطسون؟ حتى بالمسلسل حاطين واطسون له بلوق ويكتب فيه قصصهم من القضايا! تخيلوا لدرجة إن المجموعة الأولى للرواية كتبت على مدار عشر سنوات متخيلين؟ بالنهايه قرر الكاتب يوفر وقته ويقتل شارلوك جلس القرّاء ثمان سنوات يبون شارلوك يرجع! مستوعبين أني أقول (سنوات) بالنهايه ماكان فيه مفر من العوده لكتابة شارلوك .. 18 سنه بين الوفاة والرجوع مثلت لنا بثلاث ساعات؟ بالله مو نوع يستاهل ينشاف؟ شي فيه شغل تحس إنك تشوف شي متعوب فيه! يعني يوم قريت كيف إن شخصيه خيالية أثرت كل هالتأثير على الناس بهذاك الوقت حسيت إنه شي ذكي ومتقن ..
شخصياً ما قدرت أحس بعيب حتى لو نزل المستوى فهو مانزل إلا شوي وبحلقة وحده حسبت إن المسار بينقلب للخرابيط لكن أشوى، أكرر لا أحد يتحمس ويحسبه من النوع الأكشن لأ لاتتوقعون إنه حماس مره لأ .. تحقيق بس من النوع الراكد شوي.. أتمنى اللي يشوفه يقول لي وش رايه وكذا.. الصراحة صعب الواحد يكتب ومايحرق شي p: لو فيه إقتراحات مشابهة لهالنوع أنا بالإنتظار أكييد ..
إن شاء الله يعجبكم..
'You see, but you do not observe'
SH.H_____________________________
ليست هناك تعليقات:
إرسال تعليق